Còsa ch’a l’é toa tèra?

A l’é tò sangh

la sava ch’a scor an toe ven-e,

a l’é toa mare.

Cosa ch’a l’é ‘l Piemont?

L’é ‘l sudor dij tò vej

la siviltà dël travaj

la patria dla passiensa

la rèis ëd toa esistensa.

A l’é ‘l canton

pì bel dël mond,

l’é tò orisont.

Còsa ch’a l’é toa lenga?

A l’é cola ch’at consent

ëd dì toi sentiment,

toe gòj e toe pen-e

trovand paròle giuste.

Còs l’é la poesìa?

A l’é na fiama

ch’a brusa, ch’a scàuda

ch’at soleva e ch’at salva

dal paciòch ëd la vita.

Ma l’òm, cos’é-lo (për ti) l’òm?

L’é tò fratel

fieul dl’istess Pare.

E i soma tuti uguaj

Dësment-lo mai.

(Cos’é-lo - Mario Paris)