PANCALÉ

Pancalé an riva al Pò teren fecond

për coltivé la menta piperita

che 'l tò nòm l'han rendù famos al mond

co'l prodòt ch'a tonifica la vita.

Ij tò alambich a fan da siminera

ch'a spant antorn 'l përfum dël distilà

da la nivola 'd vapor 'd la fumera

ch'a rend l'ambient 'd la menta saturà.

Tra ij margin dël Pò a së sparpaja 'l fum

sl'onda pàsia che a scor lontan al mar

come na carëssa sle aque dël fium

da rende al respir un ton salutar.

Pancalé 'l tò rimedi tocasan

produssion che daspërtut l'é avosà

necessari a lë bsògn dël còrp uman

vantage a la salute malandà.

Pais ëd le viverbe an profusion

Pancalé avanguardia për ecelensa

për manten-e viva la tradission

che ij vej han lassane con l'esperiensa.

LA  MENTA  'D  PANCALÉ

Quand a-i ven 'nt l'istà l'epoca dë sijé

la menta piperita 'd Pancalé

menta 'd rinomansa dai temp antich

dëstilà 'nt le cassin-e 'nt j'alambich,

s'àussa ant l'aria na nebia bianca 'd fum

ch'a spatara dapërtut 'n fòrt përfum

che dal vapor caud 'd lë scart ëd la rapa

a spurga ij polmon come na gialapa.

Dal lambich la stòrta d'aram arissa

dëstila l'euli 'd menta a stissa a stissa

che ratificà an alcol o pr'essensa

për ël consum e lë bzògn 'd l'esigensa

conforma va la mòda an col moment

an na nuansa 'd gust e asortiment:

përfum, unguent, cosmetich e tintura

për l'estetica dël còrp e sua cura

e fé comersi dël gener 'd produzion

che l'articol esig 'd consumassion

'd bibite, siròp, infus e licor

ch'anfondo al bon-gusté piasi e vigor.

ËL  MULIN

Oh! 'l vej mulin ëd fianch al monasté

con la roa fërma 'nt l'eva coria

monument antich, simbol 'd Pancalé,

frament dë stòria 'd n'epoca finia.

Ant la bialera ch'a cor a-i tò pé

novo j'ochèt co'ij pess an compania

ti it guarde da l'àut la gent a passé

sentinela oltra ij secoj che ancor vija.

Ët tanz an tan a-i dan n'andi a tua roa

sensa la pera ch'a mulin-a 'l gran

e chila a vira coma anlora sla broa

a fior d'eva 'd l'Angial 'nt ël fluì dosman

për arposesse peui sël pòst andoa

apogià a l'erbo seugna ij temp lontan.

LA  POMPA  'D  SAN  RÒCH

Eva 'd sorgent ciàira frësca e bondosa

che la contrà 'd San Ròch debòrda e sassia

ch'la gent a serca për la sej ch'a pasia

e për natura medicamentosa.

Tornand dal travaj van a la fontan-a

a bèive e rinforsesse d'eva pura

ij passant për riceta 'd fé la cura

ëd dësantossié 'l còrp për ch'a s'arsan-a.

Adoss 'd salute arnomà 'd Pancalé

consijà dal medich për la digestion

come terapia an tute le stagion

ant tute j'ore ch'arbat ël cioché.

Adieu bon temp da vnì a tracané 'n gòt

a fé la dieta e rinfresché la gola

da peui ch'l'han fait tut un-a mës-cia sola

co'l forniment potabil 'd l'aquedòt.

Passand 'nt l'anviron 'd San Ròch 's vëdd ancora,

giumai l'é ricòrd, ch'j'era na sorgiss

con ël galarin cintà ant ij mon fiss

che mincatant una lacrima a piora.

FRITÀ  D'ERBËTTE

Frità d'erbëtte 'd tuti ij gust nostran

picant e doss ch'a son na tenerëssa

con j'euv frèsch dël gioch montà e frolà a man

co'l formagg peivrà che a la gonfia spëssa.

Man man ch'a cheuss pija 'n color ch'l'é na blëssa

con un përfum da desbogé la fam,

soletica 'l gariòt com na carëssa

che la frità anvita për un mangé san.

Erbe chërsue an teren da sfruté,

ël mej dël bon gust an gastronomia

na bontà che ij laver fa s-ciopaté.

Stussica la saliva che a gatija

lë stòmi ch'a digeris volonté

la frità d'erbëtte vera angordia.

ËL  RITIR

Ël ritir ëd San Gaetan

residensa për j'ansian

për la gent ch'à l'é rivà

al traguard 'd la tersa età

ch'a sospira chiete arpòs

'n pò d'arlass a-i pòvri òss.

Con j'aciach ant ël fardel

strach e languid ël servel

co'l baston ëd la veciaja

ch'a compagna e ch'a pontaja

ij pass meusi sij senté

'd la comun-a 'd Pancalé

sercand 'd fianch l'Angial na banca

a arpijé 'l fià che 'd tanz 'n tan 'n manca

l'é l'afan ëd mincadi

pr'un ch'as sent pi nen ardì.

Scor ël temp tranquil passient

ant le regole dl'ambient

an col tenor seren ëd vita

che l'ospitalità anvita

a scambievol carità

e cordial fraternità.

Quand a son ëd bon umor

e sla conto lì tra 'd lor

dij sò temp e dël travaj

e dle man faità dai quaj,

ai ricòrd ëd la famija

quand ch'a l'era tuta unia

'l cheur s'arlegra sël moment

che 'l passà torna present

co'l bagagi dla sua stòria

'nt ël cassiòt ëd la memòria.

Ognidun a l'é gelos

'd sue aventure che la vos

quand a-i conta an compania

as fà bassa com na spia.

Jé 'dcò ij di 'd malinconia

'd solitudin ch'a dësvija

con la neuja drinta 'l cheur

magagne da brusacheur

semnà 'n di tra 'l gram e 'l bon

ant ij sorgh ëd le stagion.

Smija che tut dantorn a cròla

ch'a fà sté sensa paròla

con la ment 'mbotijà 'd magon

'd malumor e 'd delusion.

Son ësfògh purtròp 'd preuva

come 'l nivol mnassa pieuva

ma che tòst s'arpija an pien

e 'l moral torna seren.

Sla fiducia e sla speransa

con arsiproca esultansa

ij veteran pr'ossequiensa

ant la man 'd la Providensa

'l cheur armëtto con la ment

umiliand ij sentiment.

Esse 'n credit 'd bon-e man

dle seur ëd San Gaetan

as treuvo j'òspit content

sodisfait dël tratament

ch'a lor riguard dë 'd di e 'd neuit

a-j pròdigo con bel deuit

con ëscrupol e favor

generos e con grignor.

Al moment 'd la refession

dòp la supa a colassion

disné e sin-a a issé l'aptit

mnestra e carn 'n bianch o frit

con verdura frësca dl'òrt

acomodà an tute sòrt

tut organich bòt për bòt

mes-cià al bon gust d'un goblòt.

Peui con fede e arconossensa

ringrassiand për l'assistensa

con la gòj e calor uman

canto an còro fòrt e pian

un acòrdi d'Aleluja

con la vos che 'n pòch a roja

'n pò stonà da l'emossion

ma anteneria 'd devossion.